الزم حدودك: روشتة واقعية للتعافي من العلاقات المؤذية:علي موسى

الحدود بتغيب لما بتلاقي روحك مغروز في حياة اللي حواليك أكتر من اللازم بالشكل اللي ينسِّيك نفسك ويخليك تيجي عليها بزيادة، الحدود بتغيب لما بتلقى روحك خايف تقول "لأ" اتقاءً لشر اللي قدامك أو رغبةً في الحفاظ عليه. الحدود بتغيب لما بتلاقيك تايه من نفسك ومشاعرك وتقديرك ليها بقى مرهون بنظرة الناس ليك. الحدود بتغيب لما بتتحرم من حقك في الخصوصية والاختيار أو الحصول على مساحة للتنفس. الحدود بتغيب حال استمرارك في تلبية طلبات الآخرين على حساب صحتك وطاقتك ومشاعرك واستمرارهم في استنزافك دون أي تقدير لظروفك، مما قد يدفعك في النهاية نحو الشعور بمزيد من السخط والاستياء لعدم معاملتك بالمثل أو حصولك على التقدير المناسب. الحدود هي السور العالي اللي بيحمي ويحافظ على حياتك ومشاعرك وممتلكاتك من تعديات الغير. الحدود هدفها التمييز بين ما يناسبك وما لا يناسبك من أفكار وأنشطة وعلاقات. الحدود إنك تقول "لأ" لما يكون ضروري إنك تقول "لأ". الحدود هي إشارات تحذير للغير إن هناك شيئًا يفوق احتمالك، وإن لديك حدود يتم التعدي عليها، وإن عليهم احترام ذلك ومقابلة ردك ببعض من التقدير والتفهم.